تحيا الحرب على الارهاب

تحيا الحرب اللي تهجرنا
وتخلينا نسيب اوطاننا
والحرب هدفها تحررنا
والحرية ماليها ابواب
تحيا الحرب على الارهاب
تحيا الحرب اللي تموتنا
وتدخل اغراب في بيوتنا
ويدوروا ع النووي في جيبنا
وفي الجذمة وكمان في شراب
تحيا الحرب على الارهاب
يحيا الحكام عاشوا رجالنا
بيضحوا عشان مستقبلنا
ويجاهدوا ويفاوضوا عشاننا
كتر خيركم كلنا كباب
تحيا الحرب على الارهاب
تخيا الخرب اللي تخلينا
نقتل بعض ونبكي علينا
وندور على مين يحمينا
من نفسنا ونكون له كلاب
تحيا الحرب على الارهاب
يحيا العدل وعاشوا رواده
العدل الدولي وزناده
عدل الغابة يبقي قصاده
الجنة وقصادها عذاب
تحيا الحرب على الارهاب
يحيا الغرب ويحيا سلامه
الطير على روسنا قدامه
ونسقف له عاجبنا كلامه
ده كلام ولا موسيقى الراب
تحيا الحرب على الارهاب